قصيدة نصيحة للشاعر / غازي معيض المويعزي

الله يبشر صاحب العقــل بالخيــــر            بعيشة هناء والاخرة بالسلامه

دايم سليم العقل حسن التدابيــــر               ولا يلحقه من كل عاقل ملامه

انظر ترى بالكون عبره وتبصير             تدلك على اللي سيّره بانتظامه

شمس وقمر ونجوم تزهر مزابير          فيها الشهب والموعظة والعلامة

ليل ونهار(ن) مستديره بتقديــــر            عقب الظلام النور يجلى ظلامه

أرض وسماء والمزن تمشي طوابير        برق ورعد بأمر الولي بالتحامه

كل الفلك بالكون من حولنا يسيــــر          وحنّا بهالموضوع فينا غشامــه

لا نقبل التذكيـر ومافيه تفكيــــــــر        والله هجرنا بالمصاحف كلامـــــه

نسمع مواعظ وماحصل فيه تغيير         ولا ندري ان الموت هو القيامـة

والموت ماتدري متى يمّك يغير               ليتك تجهّز قبل يكساك خامــه

في ساعة(ن) مالك بها معين ومجير         والعقل يصحى وقتها من منامه

ياصاح لا يشغلك عد الدنانيـــــــــر          صارت على قارون ذل وندامه

وان كان لك منصب توقّع ولا تطير         فرعون وينه عقب عالي مقامه

بنور(ن) من الله سير وإرج التياسير      احفظ فروض الله واترك حرامه

والنفس سخرها على الخير تسخيـــر         تـــراه مثل الطفل بأول افطامه

لا طعتها تكثر عليك المشاويــــــــر         تكفخ ورى الممنوع زايد اهيامه

واحذر صديق السوء شين التفاكير        وجهه غشاه من المعاصي علامه

مافاد نفسه وانت ترجي منه خيـر         لا يخدعك في زين لبس العمامه

ودنياك هذي مثل زهر النواويــر         ياسرع يبست عودها وانصرامه

ان كان تبغى الخير اتبع هل الخير           عزك ترى بالدين والاستقامه

وعن سنة المعصوم لا تصد وتديــر          الله قوي البطش خاف انتقامه

قلت النصيحة من محبـــة وتقديــــر     لاهل الوفاء واهل الكرم والشهامة